ما تقوليش
خليني جوه عنيكي أعيش
كل العيون اللي ناديتني
قبل منك ما تساويش
نظرة منك.. كلمة منك
بسمة منك.. دمعة منك
أصل ياما حلمت إني
حلمت إنك
كنتي جنبي من زمان
من قبل حتى ما نتولد
من قبل ما نلاقي البشر
حوالينا ماليين المكان
ونجوم كتيرة بتحكي لينا
عن سفرها ف كل يوم
لاجل ما تلاقي الحبيب
قبل الغروب
ما تقوليش
أصل عصر الحب عدى ما شفتكيش
والزمان يا ما جاب وودى وما ادنيش
ما تقربيش وما تبعديش
خليكي واقفة ف الأمان
وما تخافيش
لا يمكن أقدر أألمك
أو أقسمك
نص جنة ونص نار
أصل اللي داق م المرار أنهار
وحب نسمة في قلب ريح دوار
دفع غرامة الانتظار
ووصل محطة
يتساوى فيها الاختيار
خليكي عندك زي ما انتي
وخليني بس
ف عنيكي أعيش
أصل اللي فيها ما يتحكيش
والغناوي ما تنتهيش
خليني أكتب غنوتك من غير آلام
د القلب لسه ف غربته صياد كلام